Libreng Kurso Sa Panulat
Alang Sa Mga Magtatampo Sa Young Blood Writer

AGIG dugang pagdasig sa kabatan-onan nga may hilig sa panulat,
gidapit namo ang tanan sa pag-apil sa Young Blood Writer section ning
Bisaya diin ang mosalmot makapahimulos ning mosunod nga mga
benepisyo: 1.) Kahigayonan nga mapatikan og sinulat; 2.) Kon
kapatikan na, makadawat og bayad sa sinulat; 3.) Awtomatik nga entry
alang sa pasidunggang "Labing Masaarong Bag-ong Magsusulat Sa
Bisaya"; 4.) Libreng pagtudlo (tutorial) ug libreng mga basahon
sa
panulat pinaagi sa internet; ug 5.) Kahigayonan nga mahimong hingpit
nga magsusulat ugma damlag.
Hinuon, klarohon namo nga ang entranteng makapahimulos niining
libreng pagpanudlo kadto lamang magtatampo nga adunay e-mail address
sa internet.
Amo usab silang gidasig sa pagbisita sa
http://groups.yahoo.com/group/bisaya_readers aron makapahimulos sa
dinalian nga critical assessment sa ilang mga sinulat ug usab aron
ikahinasa ang ubang mga magtatampo kun magsusulat nga magduawan sa
maong balayan. Kining maong paagi makapadali sa pagkat-on kon unsaon
gyod pagsulat sanglit tudloan man ang si bisan kinsang interesado sa
pribadong pamaagi nga di na kinahanglang mabasahan sa kadaghanan
dinhi sa magasin. Ang mga kahuyangan sa sugilanon, matabangan ug
mahilot dihadiha nga walay bayad. Mahimong magposte ang si bisan
kinsa og usa ka lehitimong pangutana bahin sa panulat og kini tubagon
usab dayon. Niining paagiha, mawala na ang naandang kahasol ug ang
tanan makasugyot ug makapartisipar sa bisan unsang diskusyon nga may
kalabotan sa panulat apil na ang paghisgot sa batadila.
Gawas sa serbisyo alang sa bag-ong mga magsusulat, ang maong balayan
mao usay ekstensiyon sa Reader's Inbox ning Bisaya. Sa matag
karon ug
unya, may mabasa kita sa maong balayan nga mga hukngay sa nangapatik
nga sugilanon, nobela, balak, gumalaysay, ubp. ning Bisaya. Sa
pagkakaron, makapahimuot nga aduna nay daghang mga magbabasa ug mga
magsusulat nga nagbayloay sa ilang mga hunahuna bahin sa ilang nabasa
ning magasin. Gani, may mga Bisaya pa nga tua sa laing nasod nga
nangapil sa diskusyon.
Gugola ang imong bakanteng panahon sa pagbisita ning maong onlayn nga
discussion group. Daghan kag makat-onan dinhi.

Ipadala ang mga tampo sa: Young Blood Writer, Bisaya Magazine,
Muralla cor. Recoletos St., Intramuros, Manila o sa e-mail add:
bisaya_manilabulletin@...— KAPANGULOHAN